My Bodo Land News (Reporter)
23 जुनः बोहैथि दाननिनो बावैसो साननि सिगां सोनाब बेंगल राज्योनि थागिबि नेपालि माहारिनि सायाव राज्यो सरकारा बिमा बाथुलनि गोसो नोजोरजों नुजाथिनाय जेंनाया राज्योनि नेपालि माहारिखौ रागा फोजोंहोदों आरो राज्योआव दुंहाव थासारि सोमजिहोदों। सोनाब बेंगल राज्योनि गिबि मन्थ्रि ममता बेनार्जीनि दैदेन्नायाव सरकारनि खुंथायाव नेपालि एबा गर्खालेण्ड ओन्सोलाव नेपालि फरायसालियाव बेंगलि बिजों थिसननांगौनि नारसिन्नायनि हेंथायै बे दुं-दुं-हाव-हाव थासारि सोमजिहोखांदोंमोन। बेनि हेंथायै गर्खालेण्ड ओनसोलाव बन्दनि गोहोमा गोग्लैयो आरो गासै आयदानि हान्था-मेला फरायसालि, कलेज, दखान बायदि गोबां आयदानि फसंथान, फालांगिबायदिआ बन्द जादोंमोन। बबेखानि बेफोर सरकारनि हेंथायै खुद्रिनाया बारानिफ्राय बारा जानानै थासारिया गाज्रि गोहोम खोख्लैनायखौ नुनो मोन्दों। सरकारनि बे बायदि बिमा बाथुल गोसोनि नोजोर होनायनि हेंथायै गोख्रों गसंथानो गासै नेपालि माहारिया गावनि बिमा राव हारिनि आरो थामोन्था मोन्थाइ रैखाथिखौ लानानै खौसेयै आलादा गर्खालेण्ड दाबिनि सोमावसारनाया गोख्रों महर लायो आरो थाबथानाय गैयि बन्द सोमावसारदोंमोन। बे थासारिखौ लानानैसोनाब बेंगल सरकारा सानो गोनां जादों आरो खाफाल हमनो गोना जानाय लाबोदों। बिमा बाथुल गोसोनि नोजोर हाबाखौ नेपालि माहारिया दिनैनि सानाव गनायनानै लानो हायैनि गोहोमाव राज्योआव खुद्रिनायनि गोहोमा गोसारदों आरो खौसेनि मददजों सोमावसारनाया खौरांआ बुहुमनां गोमसारदों। थारै बर’ माहारियाबो गोबाव बोसोर समनिफ्रायनो राज्यो सरकारजों बिमा बाथुल गोसोनि नोजोरजों नासय जानाय, नेवसि जानाय, गादब जानाय बायदि थासारिजों बर’ माहारियाबो मोगा-मोदि जाबो नांदोंमोन आरो दिनैसिमबो बेफोर थासारिजों मोगा-मोगि जानांनायखौ नुनो मोन्दों। बबेखानि बेफोर बायदि थासारिनि हेंथायै गनतन्त्रनि खान्थिजों गिलु-बालु सोमावसारबोनांनाय थासारिया नोजोर थावना जादों। मख’नो गोनांदि- सोनाब बेंगल राज्योनि सिङाव थानाय गर्खालेण्ड राज्यो दाबिनि सोमावसारनायनि गोहोमखौ बरायनाय आरो मदद खालामनानै आलादाबड’लेण्ड राज्यो दाबिनि सोमावसारनायखौ गोख्रोंसिन खालामनो लोगोसेयै मिथिसार होनो थांनाय 22 जुनआव कक्राझाराव एबसु आरो गर्खा फरायसाफोरनि बान्जायनायाव सोमोनांथावना बन्जार सावनानै हान्जा सुरनाय हाबाफारिया जानानै थाङो। राज्योनि दाब दाब जायगायाव बन्जार सावनानै आलादा बड’लेण्ड राज्यो आरो गर्खालेण्ड राज्यो मोनाब्ला जों गोजोना दाबिनि हान्जा सुरनाय हाबाफारिया जानानो थाङो। गर्खालेण्ड दाबिखौ मदत खालामनानै बर’ हारिनि 50 बोसोर समनिफ्राय सोमावसारनायखौ जाफुंसार होनो जयै सोमावसारनायनि हुमखिखौ सरकारनि खाथियाव मिथि होयो आरो थाबैनो आलादा बड’लेण्ड आरो गर्खालेण्ड दाबिनि जेंनाखौ बोस्रांनांगौनि दाबि दैखांनायखौ मिथि होबावो।
(www.bodopress.com)
