My Bodo Land News(Reporter)
अदालगुरि, 3 जुनः बर’ हारिनि हारि-हारिमु आरो थामोन्थाखौ रैखाथि होनायनि थांखिजों दुलाराय बर’ फरायसा आफादआ गोबावसमनिफ्रायनो आलाद बड’लेण्ड राज्यो दाबिनानै बायदि रोखोमनि सोमावसारनायखौ बान्जायबोबाय थादों। बायदि सोमावसारनायनि उनाव गेजेर गेजेर सरकारआ सावरायनो हांख्रायहरदोंब्लाबो नाथाय जुगामि जेंना सुस्रांनायनि मोनबो राहा लायाखै। बिनिखायनो जेंना सुस्रांजायागौमानि थामहिनबा आलादा बड’लेण्ड राज्यो सोरजिजायागौमानि सोमावसारनायखौ लांबाय थागोन होन्नानै एबसुआ सोमावसारनायखौ लान्थ्रियै बान्जायबोगासिनो थादों। बिनिनो मोनसे बाहागो महरै अदालगुरिनि रौतायाव दिनै आलादा बड’लेण्ड राज्योनि दाबिजों सुबुं थुबुरमा हाबाफारि लायो। थुबुरमायाव बाहागो लानानै बिग्रायारि दैदेनगिरि थामहिनबा दुलाराय बर’ फरायसा आफादनि आफादगिरि प्रमद बर’आ बिग्रायारि गाराजों सुबुं थुबुरमायाव सरकारनि फार्से हारिनि सायाव बायदि बायदि खैसारि खालामनानै नासयनायफोरनि सायाव बाथ्रा बुङो। जेरै- बर’ बिजोंनि फरायसालियाव असमीया फोरोंगिरि थिसनन्नानै आसाम सरकारआ बर’ रावखौ फोजोबस्रांनो नागिरदों। आसामनि सोलोंथाय मन्थ्रिआ बबेबा बिहार एबा राजस्ताननिफ्राय फैनाय नङा बियो आसामाव जोनोम लानानै आसामनि बारहावा, दै लोंनानैनो गेदेर गोलाव जानाय सुबुंसो। बियो गमामायैनो मिथिगौदि- बबे बिजोंनि फरायसालियाव सोर फोरोंगिरिखौ थिसन्नानै होनांगौ। नाथाय खैसारि खालामनाय नोजोरजों बर’ राव फोजोबस्रांनायनि थाखाय नाजागासिनो दं। बे बाथ्राखौ एबसुनि आफादगिरिआ बुङो। दिनै अदालगुरि रौतानि दगु सहरिया जौसिन फरायसालि गेलेग्रा फोथाराव बान्जायनाय आलादा बड’लेण्ड राज्यो दाबियाव गेदेमा सुबुं थुबुरनायाव नुजाथिनानै एबसुनि आफादगिरिआ बर’ हारिनि जेंनाया फोजौखांनायखौ लानानै नङा बियो राव, हारिमुखौ फोथांना लाखिनो जेंना। बियो बुङो, आसामनि मेलेमजिबिफोर गुवाहाटीआव जिरायनानै बर’ हारिखौ लाना 30/70 गेलेनायखौ गेलेगासिनो दङ। बियो बुंबावो, आसामनि सुबुंआ आसामनि गासैबो हारिखौ जयैनो खालामनानै बर’ हारिखौ हारसिङै हिसाबखालामगासिनो दं बे गेलेनायाव। ब्रह्मपुत्रनि सायाव गं 20 दालां जानो हागौ नाथाय राव, हारिमु फोथांना लाखिनो हाया। राव हारिमु फोथांना लाखिनायनि राहा लानांगौ, सरकारआ मावफुंना होनांगौ, बर’ राव मावखुलिआव राव जायोब्लाबो रावहाबो खहा जाया, बर’फोरा रावखौबो एमब्राबायै बर’ रायलायनांगौ होन्ना बाथ्रा बुङा। थांनाय बिहु दिननि सिगां गुवाहाटीनि गासैबो लामाफोरखौ आसामनि बिर मुंख्लंफोरनि मानजों मुं होनाय जादों। नाथाय बेयाव रावबो बर’ हारिनि जोहोलावफोरनि मुङा जायगा मोनाखै। बेनि ओंथिया बेनोदि- आसाम सरकारआ फोरमान खालामदों बर’ हारिखौ आसामनि बाहागो नङा। बिनि अनगायैबो गुबुन मोनसे आयदायाव दैदेनगिरि बुंबावोदि- थांनाय 25 एप्रिलाव गोदान दिल्लीआव लानाय थाम खनायारि सावराय जथुमनि उनाव मोजां फिथाइ मोनसिगोन होन्ना बयबो सोमावसारनायखौ दोन्थ’दोंमोननाथाय जेबो मुलाम्फा जायाखैसै। थामहिनबा सरकारआ मोनबो रोखोमनि नोजोर लाखियैयाव दिनैनि बे गेदेमा सुबुं थुबुरमा सोमावसारनायखौ लानो गोनां जादों। सा-सान्जानि बयनिख्रुइबो बांसिन थागिबि ट्राइबेल हान्जा बर’फोरा। थांनाय 50 बोसोरसिमहालागै आलादा बर’ राज्योनि दाबियाव सोमावसारनायखौ लाबोगासिनो थादों आरो खमैबो 5 रोजासो सुबुंफोरा बे सोमावसारनायाव मुंख्लंबो जानो गोनां जादों। बबेखानि आलादा बड’लेण्ड राज्यो जाफुङागौमानि बे सोमावसारनाया थांबाय थागोन। रौतानि सुबुं थुबुरमायाव आलादा बर’ राज्यो दाबियाव फैगौ 12 जुनाव 2 घन्टा लाइफ अफनेसनेल सेमिनार, जुलाइ आरो सेप्तेम्बराव ऱांखान्थियारि होबथानाय बायदिनिफ्राय लानानै सोमावसारनाय हाबाफारि लानाय जागोन। एबसु, एन डि एफ बि (पि) आरो पिपल जइन्ट एक्सनफर बड’लेण्ड मुभमेन्टनि बान्जायनायाव खुंजानाय गेदेमा सुबुं थुबुरमायाव बिदर्भ राज्योनि मावफुं आफादगिरि सप्नजित सानाल, नेहाथारि निराज पान्डारबल, एन डि एफ बि (पि) नि आफादगिरि धिरेन बर’, एन डि एफ बि (आर) नि आफादगिरि रन्जन दैमारी, पिपल जइन्ट एक्सन फर बड’लेण्ड मुभमेन्टनि गाहाइ लेंथुमगिरि राकेस बर’ मोनहा बिबुंथि लाखियो। खमैबो 50 रोजा निख्रुइबो बांसिन सोमावसारग्रा राइजो-राजाफोरा बे सुबुं थुबुरमायाव बाहागो लादों एबसुनिफ्रायफोरमायदों। एन डि एफ बि ( पि) नि गाहाइ नेहाथारि गबिन्द बसुमतारीजों लोगोसे माखासे गागि नोगोरारिफोराबो सोमावसारनायाव बाहागो लायो। सोमावसारनायखौ सामलायो मिरुनि एबसुनि गाहाइ नेहाथारि लरेन्स इस्लारीआ।
