Simang Bodo News
24
जुनः गोदान राज्यो सोरजिनांगौनि सोमावसरनायखौ गोख्रोंनिफ्राय गोख्रोंसिन
महर होनाय बिग्रायारि सोमावसारारि हान्जाफोरनि मोनसे जुथाय आफाद नेसनेल
फेडारेसन फर निउ स्टेट सुंद’यै एन एफ एन एसनि दैदेनगिरिफोरा दिनै भारतनि
राजधानी दिल्लीयाव खौरांगिरि मेल जथुमनानै गोदान राज्यो दाफुंनानै
होनांगौनि सायाव नारसिनो। गोदान दिल्लीनि कनस्तिटिउसन क्लाबनि न’मायाव
एनएफएनएसनि आफादगिरि स्रि हरी आनेरिनि दैदेन्नायाव खौरांगिरि मेलाव एन एफ
एन एसनि मावफुं आफादगिरि राजा बुन्देला, गर्खालेण्डनि मुनिश तामां,
बड’लेमण्डनि मुनिश तामां, बड’लेण्डनि सोमावसारग्रा दैदेनगिरि थामहिनबा
एबसुनि आफादगिरि प्रमद बर’, एनडिएफबि(पि)नि आफादगिरि धिरेन बर’मोनहा
खौरांगिरि मेलाव बाहागो लानानै आथिखालाव गर्खालेण्ड आऱो बड’लेण्ड
सोरजिनांगौनि दाबियाव दुखांनाय सोमावसारनायखौ मिरु खालामना भारत सरकारा
जेसे हागौ गोख्रो गोदान राज्यो सोरिनांगौनि थाखाय थामख’नायारि सावरायनायखौ
लानांगौ होन्ना दाबि दैखाङो। बेनि थाखाय एन एफ एन एसआ अरायबो हेफाजाब
खालामगोन। लोगोसे संबिजितनि मोन्थायखौ लानानै राज्यो दाबिग्राफोरनि सायाव
सरकारा हिंसायारि जाथाय महरहोनायखौ गोथौयै दुखु मोन्नाय फोरमायो। एरैहाय
गोबाव बोसोरसिमहालागै सोलिबोनाय गोजाम दाबि बिदर्ब राज्यो, भुन्देल कान आरो
बड’लेण्ड दाबिखौ गोख्रैनो भारत सरकारा दाफुंनानै होनांगौनि थाखाय गोख्रों
दाबि दैखाङो। मानोनाभारत संबिजितयाव 2 आरो 3 दफायाव लिरखानाय मोन्थायखौ
भारत सरकारा गोख्रैयैनो मावफुंना होनांगौनि गोख्रों दाबिखौ सोमावसारग्रा
हान्जाफोरा दैखाङो। बड’लेण्ड सोमावसारनाय दैदेनगिरि थामहिनबा मिरु एबसुनि
आफादगिरि प्रमद बर’आ खौरां बिजोंङाव फोरमायथिहरनाय बादिब्ला, गोदान
दिल्लीयाव खौरांगिरि मेलनि गेजेरजों भारत सरकारनिफ्रायनो हारिनि राव, हा,
हारिमु, थामोन्थाखौ रैखाथि होनायजों लोगोसे मुलुग दर्बाराव हारिखौ
गायसन्नायनि थांखिजों आलादा बड’लेण्ड राज्यो दाबिखौ बायदि-बायदि समाव
सोमावसारनायखौ लाबोबाय थासेयावबो सरकारा बिनि सायाव गेजेर-गेजेर
सावरायनायनि मुङाव लेंहरफ्लानानै नाथाय जुगामियै जेंना सुस्रांनाय राहा
लायैया गमामायैनो दुखु मोनजाथाव। थांनाय बिसायख’थि समावबिजेपिआ खुंथाय
गोहोआव फैयोब्लानो बड’लेण्ड जेंनाखौ सुस्रांनाय जागोन होनना लिरनाय आखारै
होदोंमोनब्लाबो नाथाय बिजेपि सरकार फैनायनि उनावबो बै खोथा होनाया खोथायैनो
जानानै थाबाय मोखथांयाव महर मोनाखिसै। नाथाय बेसेबा गोबावनिफ्रायनो दाबि
दैखांबोनाय आलादा बड’लेण्ड राज्योखौ सोरजिनो हायागौमानि आगानसेबो फासयनायाव
गैया। बबेखानि सोमावसारनायखौ गोख्रोंसिनसो लांसिन्नाय जासिगोन होनना
दैदेनगिरि बर’ आ सरकारनिसिम हुमखि होबावो ।
by My Bodo Land Daily News (Face Book)
