बर' सावथुन

दैमु खुंगुर बर
 www.simangpresentation.in
मंगलबार।
2017 मायथाइखौ बर' सावथुन मुलुगनि माइल खुनथिया होनना हमनानै लानो हायो। मानोना सिगांनिख्रुइ बे मायथाइआव बर'सावथुन मुलुगनि महरखौ थारलाहैनो सोलायनाय नुदों। बादायनाय महराव आवगाय बोनायखौ नुनो मोनदों। थेवबो आं मोनसे बाथ्राखौ नुनो मोनो माखासे सावथुन दिहुनगिरिया सावथुनखौ दिहुननानै जेबो जोथोन लाया। मा बायदि फोसावनांगौ, बहा बहा दिन्थिखौ, राय्जो राजानि बिबुंथि फोरा मा, बाजेत आरो बेसेबां मुलामफा बेसेबां खहा बेफोरबादि गुमुरफोरखौ फोसावबाय थानांगौ। नङाब्ला राय्जो राजानि गेजेराव सावथुन आ अनसाय जानाय नङा। नाथाय बे मोनसे गियान आ सार सपन कुमार ब्रह्म नियाव दङ। बिथांआ आं बर' रिलिज जानाय समनि फ्रायनो गावनि सावथुनखौ जोथोन लाबोदों। बहा बहा दिन्थिगोन, मोनबेसे पेनदेल मोनखो बेफोरनि बागै बिथांआ फोसावबोगासिनो दङ। फोसावनाय गैयाब्ला जायखि जाया फसंथान आनो सोलिया। बेखायनो बलिउड आरो टलिउड फोरनि बायदि हाथाराब्लाबो खमैब्लाबो सावथुन बानायनायाव बेसे खरसा जाखो, रिलिज होखालि बेसे फैखो, दासिम बेसे बुथुमखो, रायजोनि बिबुंथिआ माबायदि, बबे सावथुना बांसिन सोलिदों बेफोरबादि बाथ्राखौ फोसावनो थाखै खावलायनाय थाबाय। मानोना आंहाबो बर' सावथुन फोसावनायनि मोनसे प्रेजेनटेसन दङ। जों गोबां सावथुन फोसावबोबाय। नाथाय खायफा सावथुन खौ बिगोमाफोरनि जोथोननि आंखालाव जों फोसावनो असुबिदा जायो। जों मिथिगौ बबे सावथुना बेसे सोलिदों बबे सोलियाखै आरो बेसे फैदों बेसे फैयाखै। नाथाय बेफोरबादि सिंनि बाथ्रा फोरखौ फोसावना होब्ला राय्जो राजाफोराबो गोसो दुंखाङो। आरो फैगो बोसोरनि सावथुन फोरा बांसिन क्रिटिकेल जागोन बेखायनो दिहुनगिरि फोरा इसे सानै हयै मोजां सावथुन दिहुननो नाजानांगोन।